د کونړ په مرکز اسعد اباد کې یو شمېر سرچینو افغانستان انټرنشنل – پښتو ته ویلي چې پاکستان یو ځل بیا په کڅۍ کلي باندې توغندیز بریدونه کړي دي. ځايي اوسېدونکي وایي، پاکستاني عسکرو نن شپه له ۸بجو څخه د شپې تر ۹نیمو بجو پورې د اسعداباد اړوند کڅۍ سیمه باندې بېشمېره توغندي وېشتي.
سرچینو زیاته کړې چې د دغو توغندیزو بریدونو له کبله د کونړ د مرکز اړوند د کڅۍ، شهباز او کړه مار کلي اوسېدونکي له خپلو کورونو څخه وتلي دي. سرچینو زیاته کړې چې پاکستاني پوځيانو ډیورنډ کرښې له هغې غاړې څخه وړمه شپه ۱۲بجې هم ورته غوندیز بریدونه کړي دي.
تر دې مخکې هم پاکستان د کونړ پر یادو کلیو باندې توغندیز بریدونه کړي چې له کبله یې د اسعداباد اوسېدونکي اړ شوي، څو خپل کلي پرېږدي او نورو سیمو ته کډې وکړي.
دا بریدونه داسې مهال کېږي چې تېره اونۍ طالبانو او پاکستان د چین په ارومچي کې سره مذاکرات وکړل. د طالبانو او پاکستان تر کنټرول لاندې رسنیو دغه خبرې اترې مثبتې وبللې، خو اسلاماباد او پر کابل واکمنو بیا په رسمي ډول د دغو مذاکراتو په تړاو هېڅ نه دي ویلي.
