له پاکستان نه تازه ستانه شوي افغان کډوال وایي، چې د لنډي کوتل په حمزه پنډغالي کې له ګڼو ستونزو سره مخ وو. دوی وایي، د یادو ستونزو له امله اړ وو چې د اداري لړۍ د بشپړېدو لپاره په ساعتونو انتظار وباسي او پاکستاني مامورینو د اداري چارو د چټکتیا په بدل کې له خلکو پیسې اخیستې.
دغه کډوالو زیاته کړې، چې په یاد پنډغالي کې بندپاتې کسان له ډېرې ګڼې ګوڼې او ناوړه وضعیت سره مخ دي. دوی د طالبانو تر کنټرول لاندې باختر اژانس سره په خبرو کې ویلي، چې د بېنظمۍ له امله پولیس ان ښځې او ماشومان وهي.
دا په داسې حال کې ده، چې څو ورځې وړاندې د همدې پنډغالي مخې ته د اسانتیاوو د کمښت او اداري بېنظمۍ له امله افغان کډوالو لاریون هم کړی و. د افغان کډوالو لپاره د خیبر پښتونخوا د لنډي کوتل په لنډمهاله پنډغالي کې مېشت هغه افغانان چې افغانستان ته د ستنېدو په تمه دي افغانستان انټرنشنل ته په خبرو کې ویلي، د اسانتیاوو د کمښت له امله له ګڼو ستونزو سره مخ دي. د دوی په وینا؛ ان پاکو اوبو ته هم کافي لاسرسی نهلري او په ورځ کې یوازې یو ځل اوبه ترلاسه کوي.
دغه کډوال وایي، د خوراکي توکو او نورو لومړنیو اړتیاوو کمښت هم د دوی ژوند له جدي ننګونو سره مخ کړی دی. په دغه پنډغالي کې مېشت افغان کډوال له نړۍوالو بنسټونو، د پاکستان له حکومت او د طالبانو له چارواکو غوښتنه کوي، چې په دواړو خواوو کې ورته لازمې اسانتیاوې برابرې کړي. څو ورځې وړاندې هم په دغه پڼډغالي کې مېشتو افغانانو د اسانتیاوو د کمښت او اداري بېنظمۍ له امله لاریون کړی و.
