پاکستان کې «ناموسي» وژنې؛ بلوچستان کې یو کس خپله مېرمن د «نامشروع اړیکو» په تور وژلې ده

دا په بلوچستان کې د ناموس په نوم لومړۍ پېښه نه ده؛ بلکې تر دې وړاندې هم دغه ډول پېښې شوې دي. د معلوماتو له مخې؛ په بلوچستان کې د «ناموس» په نوم په تېرو اوو کلونو کې ۲۷۰ ښځې وژل شوې دي.
په تېرو اوو کالو کې تر ټولو ډېرې پېښې په ۲۰۲۵کال کې ثبت شوې، چې شمېر يې ۵۸ ته رسېږي. د عورت بنسټ د شمېر له مخې؛ په ۲۰۱۹کال کې ۵۲ ښځې وژل شوې، دارنګه په ۲۰۲۰کال کې ۵۱، ۲۰۲۱ کې ۲۴، ۲۰۲۲ کې ۲۸، ۲۰۲۳ کې ۲۴ او همداسې په ۲۰۲۴کال کې ۳۳ ښځې د بلوچستان ایالت په بېلابېلو ولسوالیو کې د «ناموس» په نوم وژل شوې دي.
همدا راز د بلوچستان نصیراباد هغه ولسوالي ده، چې د «ناموس» په نوم په‌کې د ښځو تر ټولو زیاتې وژنې ثبت شوې چې شمېر يې په اوو کالو کې ۸۳ ته رسېږي.
د «عورت بنسټ» د بلوچستان څانګې مشر علاءالدین خلجي په دې اړه افغانستان انټرنشنل پښتو ته وویل، چې «د ناموس په نوم د وژنو زیاتې پېښې د بلوچستان هغه ولسوالیو کې رامنځته شوې کومې چې سند ایالت سره په پوله پرتې دي».
د علاءالدین خلجي په وینا؛ د پېښو لوی لامل اقتصادي ستونزې او پور اخیستنه ده. نوموړی وايي، چې په قبايلي ټولنه کې ښځو ته په میراث کې حق نه ورکول کېږي؛ نو کله چې یوه ښځه بل قام ته واده شي نو د پلار کور دا نه غواړي چې پلرنۍ ځمکه يې بل قام ته وسپارل شي نو له دې امله بیا په ښځه تور ولګوي او هغه مړه کړي.
ښاغلي خلجي په وینا؛ قبایلي ټولنه د ناموس د وژنې ملاتړ کوي او په وژلو کې ککړ کسان ډېر په اسانه له سزاوو نه ژغوري.