په ننګرهارکې د طالبانو د کرنې ریاست ویاند اجمل سبحاني وایي، سږ کال د دغه ولایت په څلورو ولسوالیو سره رود، دره نور، کوټ او خوږیاڼو کې پر ۴۰۶ جریبه ځمکه ځمکني توتان کرل شوي چې ۶۷۰ مټریک ټنه حاصلات به ترې ترلاسه شي.
دا په داسې حال کې ده، چې تېرکال په ننګرهار کې په ۳۰۶ جریبه ځمکه ځمکني توتان کرل شوي وو چې شاوخوا ۵۸۷ ټنه حاصلات ترې ترلاسه شوي وو. د طالبانو د کرنې، اوبو لګولو او مالدارۍ وزارت تر دې وړاندې ویلي و، چې تېرکال په افغانستان کې د ځمکنيو توتانو تولید ۹ سلنه زیات شوی و.
د دغه وزارت په خپرې شوې خبرپاڼه کې ویل شوي و، چې په ۱۴۰۴کال کې په ټول افغانستان کې ۶۸۱ متریک ټنه ځمکني توتان تولید شوي وو. په خبرپاڼه کې راغلي وو، چې تېرکال په ټولیز ډول پر ۱۰۸۱ هکټاره ځمکه په شپږو ولایتونو کې ځمکني توتان کرل شوي او د بلخ، هرات او ننګرهار ولایتونه د یادې مېوې د ډېرو حاصلاتو له امله په لومړي کتار کې راځي.
د یاد وزارت په وینا؛ د بلخ، هرات او ننګرهار ترڅنګ د بدخشان، پنجشېر او دایکندي ولایتونو بزګرانو هم دغه مېوه کرلې ده.
