په خوست کې د طالبانو د والي ویاند مستغفر ګربز وایي، چې په دغه ولایت کې د وروستيو باراني څپو او سېلابونو له امله خلکو ته ګڼ مالي او ځاني زیانونه اوښتي. د هغه په وینا؛ د خوست په مرکز، اسماعیلخېلو-مندوزیو او سپيره ولسوالۍ کې ورښتونو او سېلابونو څلورو کسانو ته مرګژوبله اړولې ده.
په خوست کې د طالبانو د والي ویاند مستغفر ګربز پر اېکس پاڼه کاږلي، چې تېره ورځ د خوست ولایت د مرکز اړوند د لکڼو په تتري کلي کې یو ۷۰ کلن سړی سېلاب وړی او د اسماعیلخېلو–مندوزیو ولسوالۍ په عليوات کلي کې د یوه کور د دېوال نړېدو پېښه کې دوه ښځې او یو سړی ټپیان شوي دي.
نوموړي زیاته کړې، چې په ځاځي میدان ولسوالۍ کې د سختې ږلۍ له امله د بزګرانو کرنیز حاصلات زیانمن شوي او د سپېرې ولسوالۍ په بېلابېلو سیمو کې د سختو ورښتونو، سېلابونو، ږلۍ او واورو له امله کرنیزې ځمکې، د ځڼغوزیو ځنګلونه، بڼونه، ویالې، کاریزونه او سړکونه زیانمن شوي دي.
هغه وایي، په ياده ولسوالۍ کې د ورښتونو له امله ګڼ شمېر څاروي تلف شوي او د بزګرانو او مالدارانو اقتصادي وضعیت هم زیانمن شوی دی.
له بل پلوه د طالبانو د پېښو پر وړاندې د مبارزې ادارې تېره ورځ ویلي و، چې په تېرو ۲۴ ساعتونو کې د افغانستان په بېلابېلو ولایتونو کې د سختو بارانونو، سېلابونو، د دېوالونو نړېدو او غرونو ښویېدو له امله لږترلږه ۱۰ کسان مړه او ۱۵ نور ټپیان شوي دي.
