د ایران او امریکا ترمنځ تر مذاکراتو وروسته په اسلاماباد کې د ځینو سیمو لارې لاهم تړلې دي
د امریکا او ایران ترمنځ په اسلاماباد کې تر خبرو اترو وروسته هم د یاد ښار ټرافیکو پولیسو یوه خبرتیا خپره کړې، چې د اسلاماباد سختې امنیتي سیمې او د هغو شاوخوا ځینې نورې سیمې په بشپړه توګه د خلکو د تګراتګ لپاره تړل شوې او یوازې دولتي موټرو ته د تګراتګ اجازه ورکول کېږي.
د پولیسو د خپور شوي بیان له مخې؛ د کشمیر څلور لارې څخه تر سرینا څلور لارې او سرینګر لویې لارې پورې سړکونه په بشپړه توګه د تګراتګ لپاره تړلي دي. تر دې وړاندې پاکستاني چارواکو ويلي و، چې د اسلاماباد ځینې مهمې سیمې به تر هغه مهاله تړلې وي؛ ترڅو چې د ایران او امریکا پلاوي له پاکستان نه نهوي تللي.
بل لور ته د راولپنډۍ ښار سوداګریز مارکېټونه هم د یکشنبې په ورځ د همغږۍ د نشتوالي له امله تړلي پاتې شول. د راولپنډۍ د ځايي سوداګرو په وینا؛ دوی څلور ورځې د خپلو هټیو تړلو ته اړ اېستل شوي، چې له امله په دغه ښار کې خلک د خوراکي توکو له کمښت سره مخ شوي دي.
