په بلوچستان کې په بېلابېلو پېښو کې پنځه کسان وژل شوي او یو بل ټپي دی
په بلوچستان کې په بېلابېلو پېښو کې پنځه کسان وژل شوي او یو بل ټپي دی. د بلوچستان په ډېره بګټي ولسوالۍ کې د پولیسو په وینا؛ د یادې ولسوالۍ پیر کوه سیمه کې ناپېژاندو وسلهوالو د امن ځواک د یوه ځايي مشر په کور برید کړی، چې له امله یې یو قبايلي مشر وژل شوی دی.
همداراز په یوې بلې جلا پېښه کې چې د یادې ولسوالۍ په سوي سیمه کې رامنځته شوې، ناپېژاندو وسلهوالو په یو کس ډزې وکړې چې له امله يې ایسکریم پلورونکی وژل شوی دی.
بل لور ته د ډېره مراد جمالي ولسوالۍ پولیس وايي، د غلو په ډزو کې ځايي کس وژل شوی او د ډزو په تبادله کې یو بل بیا ټپي دی. همداراز په جهل مګسي ولسوالۍ کې د ځایي پولیسو په وینا؛ ناپېژاندو وسلهوالو یو کس په ډزو وژلی دی. په یوه بله پېښه کې چې د نصيراباد ولسوالۍ اړوند فلیجي سیمه کې رامنځته شوې، د دېوال نړېدلو له امله یو کس مړ شوی دی.
