د افغانستان د تکواندو فدراسیون اعلان کړی، چې د هېواد دوه ځوان ملي لوبغاړي به نن د ازبکستان په تاشکند ښار کې د ځوانانو د نړۍوالو تکواندو سیالیو ۱۵م پړاو کې خپلې سیالۍ پیل کړي. دغه سیالۍ (د وري له ۲۳مې تر ۲۸مې) نېټې پورې ترسره کېږي.
په دغه سیالیو کې د نړۍ له بېلابېلو هېوادونو ۹۹۱ ورزشکارانو د بېلابېلو وزنونو په کټګوریو کې ګډون کړی، چې له افغانستان نه هم څلورو تکواندوکارانو پهکې برخه اخیستې ده. د یاد فدراسیون د معلوماتو له مخې؛ نن دوشنبه (د وري ۲۴مه) مهدي یعقوبي د منفي ۴۵ کیلوګرام وزن کې او سدیس سکندر د منفي ۷۳ کیلوګرامه وزن په کټګوریو کې به له خپلو سیالانو سره مخ شي.
د نړۍوال تکواندو فدراسیون د اعلان له مخې؛ دغه سیالۍ په لسو وزنونو کې له ۴۵ تر ۷۸ کیلوګرامه پورې ترسره کېږي.
په دغه سیالیو کې د افغانستان استازي:
مهدي یعقوبي – منفي ۴۵ کیلوګرام
عليرضا جامي – منفي ۶۸ کیلوګرام
سدیس سکندر – منفي ۷۳ کیلوګرام
محمد عذیر رشید – منفي ۷۸ کیلوګرام
د یاد ټیم مشري د تکواندو فدراسیون رییس نجیبالله سکندر پر غاړه لري او عبدالمعروف قاسمي او عبدالغفور بهرام د روزونکو په توګه ورسره مل دي.
