د بيبيسي د یوه څېړنیز راپور له مخې، په یونان کې د ترکیې له پولې سره نږدې سیمو کې یو شمېر افغان کډوال له تاوتریخوالي سره مخ شوي. په راپور کې راغلي چې یوناني امنیتي ځواکونه له ځینو ناقانونه ډلو سره، چې پخپله کډوال دي، همکاري کوي څو نور کډوال په زور بېرته ترکیې ته واړوي.
د پلټنې موندنې ښيي چې په دغو ډلو کې افغانان هم شامل دي او یو شمېر افغان کډوال هم د قربانیانو په ډله کې راځي. د راپور له مخې، دا کسان ډېری وخت له پاکستان، سوریې او افغانستان څخه دي او د یوناني پولیسو تر لارښوونې لاندې فعالیت کوي.
یو شمېر افغان کډوالو ویلي، چې کله دوی د یونان خاورې ته د پناه غوښتنې په نیت داخل شوي، نو د مخ پټو کسانو له خوا نیول شوي، وهل شوي، شتمني ترې اخیستل شوې او بیا په زور بېرته ترکیې ته اړول شوي دي.
دا کړنې د اروپایي اتحادیې او نړیوالو قوانینو له مخې ناقانونه بلل کېږي.
د اروپایي ټولنې د سرحدي ادارې د بنسټیزو حقونو دفتر په یوه رپوټ کې ویلي چې شواهد ښيي، لسګونه بهرني کډوال د یوناني پولیسو تر امر لاندې د جبري شړنې په عملیاتو کې کارول شوي دي. په راپور کې دا هم ویل شوي چې پر کډوالو فزیکي او لفظي زور زیاتی شوی او شخصي توکي ترې اخیستل شوي دي.
د یونان صدراعظم کیریاکوس میتسوتاکیس بيبيسي ته ویلي چې نوموړی د کډوالو د کارولو له دغو تورونو ناخبره دی، خو تر دې دمه د یونان چارواکو د دغو مشخصو ادعاوو په اړه رسمي او مفصل ځواب نه دی ورکړی.
یونان له ۲۰۱۵ کال راهیسې له یو میلیون څخه ډېر کډوال منلي، چې پکې زرګونه افغانان شامل دي. د ترکیې او یونان ترمنځ د ایوروس سرحدي سیمه د کډوالو لپاره له خطره ډکه بلل کېږي او د بشري حقونو سازمانونه له یوناني چارواکو غواړي چې د کډوالو د حقونو درناوی وکړي او دا ډول ناقانونه کړنې ودروي.
دا پوله شاوخوا ۲۰۰ کیلومتره اوږدوالی لري او د ایوروس سیند په اوږدو کې پرته ده.
هغه کډوال چې له سیند څخه تېر شي او یونان ته داخل شي، یوې سختې پوځي شوې او محدودې سیمې ته ننوځي چې د څار برجونه پکې جوړ شوي دي.
