د اتومي انرژۍ نړیواله اداره: شمالي کوریا د اتومي وسلو د جوړولو وړتیا لوړه کړې ده
د اټومي انرژۍ نړیوالې ادارې مشر رافایل ګروسي ویلي، چې شمالي کوریا د اتومي وسلو جوړولو وړتیا په جدي ډول لوړه کړې ده. د سویلي کوریا څارګرې ادارې ویلي، چې شمالي کوریا د یورانیمو د بډایڼې څو تاسیسات لري، چې دا د جنګي اټومي خولیو جوړولو لپاره اړین ګام دی.
په دغو تاسیساتو کې د یانګبیون اټومي مرکز هم شامل دی، چې پیونګ یانګ له خبرو وروسته په ښکاره غیر فعال کړی و، خو دغه مرکز یې په ۲۰۲۱ کال کې بېرته فعال کړ.
رافایل ګروسي په سیول کې یوې خبري ناستې ته ویلي: «په دوامدارو ارزونو کې مو تایید کړې چې د یانګبیون ریکټر فعالیتونه چټک ډېر شوي دي.»
نړیوالې ادارې او د سیمې هېوادونه له اوږدې مودې راهیسې د شمالي کوریا د اتومي پروګرام په اړه اندېښنه لري.
