د افغانستان د کرېکټ ملي لوبډلې سوکه توپ اچونکی نور احمد لکڼوال د ۲۰۲۶کال د هند غوره لیګ سیالیو کې د چینای سوپر کېنګز او کلکته نایټ رایډرز ترمنځ په لوبه کې خورا ښه وځلېده. هغه په څلورو اورونو کې یوازې ۲۱ منډې ورکړې او درې لوبغاړي یې وسوځول.
نور احمد چې د چنای سوپر کېنګز لوبډلې برخه دی، په همدې لوبه کې یې خپله لوبډله تر بریا ورسوله او د سیالې لوبډلې په مهارولو کې یې مهم رول ادا کړ. چنای سوپر کېنګز لومړۍ توپ وهنه وکړه او په ۲۰ اورونو کې یې د پنځو لوبغاړو په سوځېدو ۱۹۲ منډې جوړې کړې.
سیالې لوبډلې کلکته نایټ رایډرز وروسته توپ وهنه وکړه، نوراحمد په څلورو اورونو کې د همدې لوبډلې ۳ لوبغاړي وسوځول او یوازې ۲۱ منډې یې ورکړې. چنای سوپر کېنګز یاده لوبه د ۳۲ منډو په توپير وګټله او نوراحمد د لوبې غوره لوبغاړی وټاکل شو.
دا په وروستیو پنځو لوبو کې د چنای دویمه بریا وه. دغه لوبډله د لسو لوبډلو په جدول کې د څلورو امتیازونو په لرلو سره اتم ځای لري.
