د سویلي وزیرستان واڼه_اعظم ورسک لویه لار چې د پاکستان امنیتي ځواکونو لهخوا له اوږدې مودې راهیسې تړل شوې، ځایي خلکو او سوداګرو یې په غبرګون کې لاریون کړی. لاریون کوونکي وایي، د یادې لویې لارې د تړل کېدو له امله د سوداګرو او ځايي خلکو ورځنی ژوند او اقتصادي فعالیتونه اغېزمن شوي.
لاریون کوونکي ادعا کوي، د پاکستان امنیتي ځواکونو د سړک په اوږدو کې ګڼ شمېر کورونه نیولي او د خپلو پوځي کمپونو لپاره يې کاروي چې له امله يې دغه لاره د امنیتي ستونزو له مخې تړل شوې او څوک نهشي کولی پرې تګراتګ وکړي.
د ځايي خلکو په وینا، پر دغه سړک له ۱۰۳زره څخه زیاتو خلکو تګراتګ کاوه؛ خو اوس دوی پرې تګراتګ نهشي کولی، چې له امله یې د سیمې اقتصاد هم زیانمن شوی دی.
ځايي خلکو په دې اړه وويل، د سويلي وزیرستان واڼه_اعظم ورسک لویې لارې ته پرته سیمه کرنیزه ده چې د خلکو د اقتصاد لویه برخه په کښت او کروندې ولاړه ده؛ خو اوس دوی نهشي کولی چې خپل حاصلات پر وخت بازارونو ته وړاندې کړي چې ډېری وخت یې حاصلات خراب شي او یاهم په کمه بیه پلورل کېږي چې د ځايي کروندګرو د زیان لامل ګرځي.
د کروندګرو په وینا؛ که دغه لاره خلاصه نهشي، نو دوی به دې ته اړ شي چې کرونده پرېږدي او له دې سره به په سیمه کې بېوزلي زیاته شي او خلک به د جرمونو ترسره کولو ته اړ شي.
