د جوجېتسو او پهلوانۍ څلور لوبغاړي په اسیایي او ساحلي سیالیو کې د ګډون په موخه چین ته لاړل
د طالبانو د المپیک، بدني روزنې او سپورټ رييس وايي، د جوجېتسو او پهلوانۍ څلور لوبغاړي د جوجېتسو اسیایي او ساحلي غېږ نیونې سیالیو کې د ګډون په موخه د چهار شنبې په ورځ (د وري ۲۶مه) چین ته لاړل.
د طالبانو د المپیک، بدني روزنې او سپورټ رييس احمدالله وثیق د چهارشنبې په ورځ (د وري ۲۶مه) په خپله اېکسپاڼه هیله څرګنده کړې چې دغه افغان لوبغاړي هم هېواد ته ویاړلي او رنګین مډالونه راوړي.
هغه ویلي: «موږ هیله لرو، چې افغان لوبغاړي به په دغو سیالیو کې ښه وځلیږي او د نورو ورزشي رشتو په څېر به دوی هم خپل ګران هېواد ته ویاړلي او رنګین مډالونه راوړي».
نوموړي همداراز ډاډ ورکړی، چې د سپورټ ادارې به تل د خپلو ورزشکارانو ملاتړ ته دوام ورکړي.
