په لغمان کې د طالبانو تر کنټرول لاندې د طبیعي پېښو پر وړاندې د مبارزې او چمتووالي رییس قاري خیرمحمد غازي خبر ورکړی، چې تېره شپه د دغه ولایت په دولت شاه ولسوالۍ کې د یوه کور چت پرېوتو له امله یو کس مړ او د ښځو په ګډون پنځه نور ټپیان شوي دي.
د هغه په وینا؛ د پېښې ټپیان روغتون ته لېږدول شوي. نوموړي زیاته کړې، چې دغه پېښه تر بېګاني سخت باران وروسته شوې ده. دا په داسې حال کې ده، چې د طالبانو تر کنټرول لاندې د هواپوهنې ادارې نن (د وري ۲۷مه) په ۲۱ ولایتونو کې د شړکنده باران، تالندې برېښنا، تېزو سېلیو او سېلابونو راوتو اټکل کړی دی.
یادې ادارې د یوې خبرپاڼې په خپرولو سره ویلي، چې دغه وړاندوینه د نورستان، کونړ، ننګرهار، لوګر، پکتیا، خوست، لغمان، کپیسا، پنجشېر، پروان، میدان وردګ، بغلان، سمنګان، بدخشان، کندوز، بلخ، سرپل، غور، بامیان، دایکنډي او تخار ولایتونو لپاره شوې ده.
له بل پلوه د روانې وري میاشتې له شپږمې راهیسې د افغانستان په بېلابېلو ولایتونو کې د ورښتونو، سېلابونو، تندر پرېوتو، غرښوېدنې، زلزلې او د کورونو نړېدو له امله ۱۸۹ کسان مړه، ۲۵۹ ټپیان او ۹ کسان لادرکه شوي دي. د ورښتونو او سېلابونو له امله ۱۳۰۳ کورونه په بشپړ او ۵۸۴۶کورونه په نسبي ډول ویجاړ شوي او ترڅنګ یې ۳۷۲کیلومټره سړکونه هم لهمنځه تللي دي.
