د خیبر پښتونخوا په بنو کې ناپېژاندو وسله‌والو درې واکسیناتوران تښتولي دي

د پولیسو په وینا؛ دغه کسان داسې مهال برمته شوي، چې په سیمه کې ماشومانو ته د پولیو ضد واکسینو د څاڅکو پر ورکولو بوخت وو. پولیس وايي، په دې تړاو یې څېړنې پیل کړې دي.
د یادونې وړ ده، چې په پاکستان کې د ګوزڼ ضد واکسینو روان کمپاین پرمهال دا د یاد کمپیاین پر کارکوونکو د برید او تښتونې درېیمه پېښه ده. لومړۍ پېښه د خیبر پښتونخوا هنګو ولسوالۍ په چهپر وزیران سيمه کې د واکسیناتورانو پر ساتونکو شوې وه. یاده پېښه هغه مهال وشوه، چې دوی د ګوزڼ ضد واکسینو په کمپاین کې د ګډون لپاره دندې ته روان وو چې پرې برید وشو او له امله یې یو پولیس ووژل شو او څلور نور ټپیان شول.
بله پېښه د بلوچستان په ډېره مراد جمالي په ټي‌اېن‌ټي کالونۍ سیمه کې هغه مهال رامنځته شوه، کله چې پولیس سرتیری د ګوزڼ ضد واکسینو کمپاین کې پر دندې بوخت وو او د ناپېژاندو وسله‌والو له‌خوا پرې برید وشو او نوموړی په‌کې ووژل شو.