د چمن مرستیال کمېشنر د افغان کډوالو پېژندنې لپاره ځايي خلک د تابعیت تاييد لپاره غوښتي
د بلوچستان ایالت د چمن ولسوالۍ مرستیال کمېشنر حبیب احمد بنګلزي په مشرۍ د یادې ولسوالۍ د پاکستاني پېژندپاڼو ارزونې کمیټې غونډه وشوه. په غونډه کې هغه ګڼ شمېر ځايي اوسېدونکي چې د افغان کډوالو شک پرې وو؛ د خپل پاکستاني تابعیت تاييد لپاره د کره اسنادو وړاندې کولو لپاره ورغوښتي وو.
هغه بېلابېلو کسانو چې پرې شک و، یادې کمیټې ته خپل اسناد وړاندې کړل. په دغه اسنادو کې د ۱۹۷۴کال پېژندپاڼې او نور اړین اسناد شامل وو، چې د کمیټې لهخوا تر کره څېړنو وروسته یادې کمیټې ډاډ څرګند کړ او دغه کسان يې پاکستاني وګړي او د چمن ولسوالۍ اوسېدونکي اعلان کړل.
د غونډې پرمهال د چمن مرستیال کمېشنر وويل:« هغه کسان چې د شکمنو افغان وګړو په توګه د پاکستاني تابعیت تاييد لپاره بلل کېږي باید ناراضه نهشي؛ ځکه چې د ملي پېژندنې تایید موخه د کوم چا یا د کومې ډلې ځورول نهدي؛ بلکې دغه اقدام د هېواد او ملت د پراخو ګټو لپاره اخیستل کېږی».
دا په داسې حال کې ده، چې روانه میاشت د چمن ولسوالۍ ځایي چارواکو لهخوا د افغان کډوالو په نوم د ځايي خلکو مارکېټونه او هټۍ هم تړل شوې وې.
له به پلوه د سېشنبې په ورځ په پېښور محکمه کې مدافع وکیلې ثنا ګلزار د هغو پاکستاني وګړو لپاره قضیه ثبت کړه، چې د افغان کډوالو له مرستو برخمنېدو لپاره یې د «پي او ار» او «اېسيسي» کارتونه جوړ کړي وو او اوس له پاکستان نه د اېستلو له ګواښ سره مخ دي.
دغه ځایي خلک چې د پاکستان کاغذي پېژندپاڼې لري، دغه هېواد ته د افغان کډوالو له راتګ سره سم د کډوالو مرستو ترلاسه کولو لپاره یې د «پي او ار» او «اېسيسي» کارتونه جوړ کړي وو.
