د اوکراین پر دریو ښارونو د روسیې په بریدونو کې ۱۷ تنه وژل شوي
د اوکراین پر پلازمېنه کیېف، اودیسا او دنیپرو ښارونو د روسیې په توغندیزو او ډرون بریدونو کې لږترلږه ۱۷ تنه وژل شوي او لسګونه نور ټپیان دي. د چارواکو په وینا، په وژل شویو کې یو ۱۲ کلن ماشوم هم شامل دی.
دغه توغندیز او د بېپیلوټه الوتکو بریدونه د شپې پرمهال شوي او په پایله کې یې استوګنیزې ودانۍ او نور ملکي تاسیسات زیانمن شوي دي.
د بریدونو له امله په کییف کې څلور، په اوډیسا ښار کې اته تنه او په دنیپرو ښار کې څلور ته وژل شوي دي.
سیمهییز چارواکي وایي چې په دغو بریدونو کې ګڼ شمېر استوګنیزو ودانیو اور اخیستی.
ولسمشر زیلینسکي ویلي چې دا بریدونه ښيي روسیه د نړیوالو فشارونو د کمېدو وړ نه ده.
هغه ټینګار کړی چې پر روسیې باید فشار زیات شي او له اوکراین سره د مرستو ژمنې پر وخت عملي شي.
د اوکراین د هوايي ځواکونو په وینا، په تېرو ۲۴ ساعتونو کې یې لسګونه توغندي او سلګونه ډرونونه شنډ کړي، خو بیا هم یو شمېر یې خپلو هدفونو ته رسېدلي دي.
په ورته وخت کې، روسي چارواکو ویلي چې دوی پراخ برید کړی او د اوکراین د پوځ اړوند انرژۍ او تولیدي تاسیسات یې په نښه کړي دي.
بل لور ته، د روسیې په تواپسه بندري ښار کې هم د اوکرایني ډرون برید راپور ورکړل شوی، چې لږ تر لږه دوه کسان پکې وژل شوي او یو لوی اور یې بل کړی دی.
