ایران او امریکا پر اټومي مسایلو د اختلاف له امله د یوې لـنډمهاله هوکړې په لـټـه کې دي
د امریکا او ایران مرکچیانو یوه بشپړ سولهییز تړون ته خپلې تمې راکمې کړې او اوس د یوه لنډمهاله هوکړه لیک په لټه کې دي، څو د جګړې د بیا پیل کېدو مخه ونیسي. دا بدلون د تېرې اونۍ په پای کې په اسلاماباد کې له بېپایلې خبرو وروسته راغلی.
دواړې خواوې د ایران د اټومي پروګرام پر سر ژور اختلافونه لري.
یو لوړپوړي ایراني چارواکي رویټرز ویلي چې دواړو لوریو ځینې اختلافونه، په ځانګړي ډول د هرمز تنګي د مدیریت په برخه کې، کم کړي دي.
ایران، چې له کلونو راهیسې د امریکا له سختو بندیزونو سره مخ دی، غواړي په هوکړه لیک کې دا هم شامل وي چې واشنګټن د ایران ځینې کنګل شوې شتمنۍ ازادې کړي او په بدل کې به ایران اجازه ورکړي چې نورې کښتۍ هم له تنګي تېرې شي.
یوې بلې سرچینې ویلي چې ایران کولی شي د خپلو وړاندیزونو له مخې کښتیو ته اجازه ورکړي چې د عمان اړخ له لارې په خوندي ډول تېرې شي.
خو د دوو اونیو اوربند نیمایي ته په رسېدو سره لا هم ژور اختلافونه شته. دا اختلافونه د ایران د لوړې کچې بډایه شویو یورانیمو د زیرمو د برخلیک او د اټومي فعالیتونو د بندېدو په مودې پورې تړاو لري، چې امریکا غواړي دا فعالیتونه اوږدمهاله بند شي.
ایران له اوږدې مودې راهیسې غوښتنه کوي چې امریکا دې د تهران د یورانیمو د بډاینې حق په رسمیت وپېژني.
تهران وایي دا کار یوازې د سولهییزو موخو لپاره کوي، خو لوېدیز هېوادونه او اسراییل باور لري چې هدف یې د اټومي وسلو جوړول دي.
یو لویدیز ډیپلومات ویلي چې د اټومي موضوع لا هم «اصلي خنډ» پاتې ده.
