د خیبر پښتونخوا د تیرا بې ځایه شوي لا هم خپلو سیمو ته د ستنېدو په تمه دي

هغه تور ولګاوه چې په تیرا کې د دوی مېوه لرونکې ونې پرې شوې او ځینې ځمکې په غیرقانوني ډول نیول شوې دي. ده زیاته کړه، « متاثره کورنۍ اوس هم د باړې او پېښور په کرایي کورونو کې ژوند کوي او د حکومت عملي اقدام ته انتظار باسي».

د خیبر سیمه ییزې ادارې ویلي، چې د تیراه میدان سیمه کې لومړی ځل بشپړ حکومتي واک ټینګ شوی او د بیا رغونې چارې او پرمختیایي کارونه چټک روان دي.

د خیبر مرستیال کمیشنر بلال شاهِد راو ویلي، «یوه لویه پروژه پای ته نژدې شوې او ۱۹ حکومتي ادارې هلته فعالې شوې دي».

د نوموړي په وینا، د ټولو ادارو لپاره به کارکوونکي ګومارل کېږي او سیمه ییزو خلکو ته به ترجیح ورکول کېږي، چې دا زرګونو کسانو ته کاري فرصتونه برابروي. همداراز ده ویلي، د امنیت لپاره به دوه زره پولیس هلته وګومارل شي.

چارواکي زیاتوي چې په میدان سیمه کې لومړی ځل سړکونه جوړ شوي چې نه یوازې تګ راتګ اسانه کوي بلکې اقتصادي او ټولنیز حالت ته وده ورکوي.

د تیرا سیمه کې د وسله‌والو ډلو د شتون پر مهال عملیات اعلان شوي وو، چې له امله یې خلک په سخت ژمي کې بې ځایه شول، خو د عملیاتو هغسې څرک ونه لګېد.

د تیرا دره شاوخوا ۱۵۰ کیلومتره اوږده قبایلي سیمه ده، چې ډېری د خیبر ولسوالۍ برخه ده، په داسې حال کې چې ځینې برخې یې په اورکزۍ او کورمې ولسوالیو کې هم شاملې دي.

د ځایي مشرانو په وینا، دا یوه ستراتیژیکه مهمه سیمه ده ځکه کرښې یې له افغانستان سره لګیږي.