د افغان کډوالو له پراخو شکایتونو وروسته د خیبر پښتونخوا په خیبر ولسوالۍ کې پولیسو د افغان کډوالو لپاره د لنډي کوتل په لنډمهاله پنډغالي کې ستنېدونکو کډوالو ته د نوبت «ټوکن» ورکولو په بدل کې د بډې اخیستنې په تور درې کسان نیولي دي.
پولسیو ویلي، چې په دغه پنډغالي کې د نیول شویو کسانو لهخوا افغان کډوالو ته د پیسو په بدل کې جعلي د بېرته ستنېدو ټوکونونه ورکول کېدل. پوليس وايي، چې دوی د نعمت، سدیس او اخترخان په نوم د خوږه خېلو سیمې اوسېدونکي نيولي او پر ضد یې قضیه ثبت کړې ده.
پوليسو له افغان کډوال غوښتي، چې داسې کسانو ته باید د بېرته ستنېدو پرمهال د نوم لیکنې لپاره پیسې ورنهکړي او که څوک د پیسو غوښتنه ترې کوي؛ نو دوی دې له نږدې پولیسو حوزې سره دغه موضوع شریکه کړي.
د یادونې وړ ده، چې څو ورځې وړاندې هم په لنډي کوتل کې داسې کسان نیول شوي وو چې له افغان کډوالو یې په ناقانونه توګه پیسې اخیستې.
یوشمېر افغان کډوالو تر دې وړاندې نیوکه کړې وه، چې د بېرته ستنېدو پرمهال له ډېرو ستونزو سره مخ شوي دي. د یادو کډوالو په خبره؛ د دوی د ثبت لړۍ ټکنۍ ده او په دې برخه کې ګومارل شوي پاکستاني کارکوونکي په بېلابېلو پلمو پیسې شکوي.
