د افغانستان د کرېکټ ملي لوبډلې د تمریناتي کمپ لومړۍ ورځ د یادې لوبډلې د نوي روزونکي ریچارد پایبس تر څار لاندې په کابل ښار کې ترسره شوه. د افغانستان د کرېکټ بورډ د اعلان له مخې؛ د تمریناتو په لومړۍ ورځ نږدې ۴۰ لوبغاړو ګډون کړی و.
ټاکل شوې، چې دغه تمریناتي کمپ د یوې میاشتې لپاره دوام وکړي. کرېکټ بورډ همدارنګه ویلي، چې شاوخوا ۲۰ کورني او بهرني روزونکي هم د یاد تمریناتي پروګرام په ترسره کولو کې له ریچارد پایبس سره مرسته کوي.
د دغه کمپ موخه پنځه ورځنیو سیالیو او دارنګه د هند ملي لوبډلې پر وړاندې د درېیو یو ورځنیو نړۍوالو لوبو لړۍ ته د افغانستان د کرېکټ ملي لوبډلې چمتووالی ښودل شوی دی.
د پخواني روزونکي جاناتان تروت تر لرې کېدو وروسته د افغانستان کرېکټ بورډ اعلان کړی و، داسې روزونکی غواړي چې نه یوازې نړۍواله تجربه ولري؛ بلکې د هېواد دننه هم د کرېکټ د ودې، د نوو استعدادونو د موندلو او روزنې په برخه کې مرسته وکړي او په افغانستان کې فعاله ونډه ولري.
