په افغانستان کې د خبریالانو د وضعیت په اړه اندېښنې زیاتې شوي، ځکه ۳۶۰خبریالانو، د رسنیو کارکوونکو او د بشري حقونو فعالانو په یوه پرانیستي لیک کې د طالبانو له لوري د بندي خبریالانو د سملاسي او پرته له شرطه د خوشې کېدو غوښتنه کړې ده.
د یاد لیک لیکوالان وایي، هغه خبریالان چې دا مهال په بند کې دي، یوازې د خپلې مسلکي دندې، خبر رسونې او د عامه پوهاوي د هڅو له امله نیول شوي دي. د دوی په وینا، د خبریالانو بندي کول پر بیان ازادۍ ښکاره ګوزار دی او له نړیوالو منل شویو اصولو، بشري حقونو او اسلامي ارزښتونو سره په ټکر کې دي.
په دغه لیک کې، چې د ملګرو ملتونو سرمنشي، اروپايي ټولنې او د رسنیو ملاتړو نړیوالو بنسټونو ته استول شوی، د شکېب احمد نظري، بشیر هاتف او حمید فرهادي نومونه هم په څرګند ډول یاد شوي دي.
لاسلیک کوونکو خبرداری ورکړی، چې د یو شمېر بندي خبریالانو روغتیايي او رواني وضعیت د اندېښنې وړ دی او په ځانګړي ډول یې د بشیر هاتف او شکېب احمد نظري د خراب حالت یادونه کړې ده.
دوی ټینګار کوي، چې د دغو خبریالانو د روغتیا او خوندیتوب مسوولیت د طالبانو پر ادارې دی او د هغوی د برخلیک په اړه چوپتیا او بېپامي یو نهبښونکی عمل بلل کېږي.
د لیک په پای کې له ملګرو ملتونو، د خبریالانو د ساتنې کمېټې، د بېپولې خبریالانو سازمان او نورو نړیوالو بنسټونو غوښتل شوي، چې د افغان خبریالانو د ساتنې او خوشې کېدو لپاره خپل ډېپلوماټیک فشارونه او عملي اقدامات زیات کړي.
همداراز، له کورنیو او نړیوالو رسنیو غوښتنه شوې، چې دې غوښتنې ته پراخ پوښښ ورکړي او د افغان خبریالانو د ملاتړ لپاره فعاله ونډه واخلي.
