د افغانستان د کرېکټ بورډ مشر میرویس اشرف خبر ورکړی، چې د افغانستان د کرېکټ ملي لوبډلې پخوانی لوبغاړی شاپور ځدراڼ ناروغ دی او اوس مهال په هند کې تر درملنې لاندې دی. د کرېکټ د نړۍ ستورو راشد خان او شاهد اپريدي هم د نوموړي پر ناروغۍ خواشیني څرګنده کړې ده.
میرویس اشرف د جمعې په ورځ د (وري ۲۸مه) د خواله رسنیو پر پاڼو لیکلي، چې د افغانستان کرېکټ بورډ د شاپور ځدراڼ مالي لاسنیوی کړی او د هغه درملنې په برخه کې یې هم ځانګړې هڅې کړې دي. همدا راز د کرېکټ د نړۍ ستوري راشد خان هم د یاد افغان لوبغاړي پر ناروغۍ خواشیني ښوولې ده.
راشد خان لیکلي: «په دې سخت وخت کې موږ له شاپور ځدراڼ سره هر ډول مرستې ته چمتو یو. دا د داسې اتل حق دی چې د خپل وطن لپاره یې کلونه ستړي ګاللي دي».
د پاکستان د کرېکټ ملي لوبډلې پخواني لوبغاړي شاهد اپريدي هم د شاپور ځدراڼ د کورنۍ له غړو سره غږېدلی دی. هغه ویلي، چې د ناروغۍ په دغه وضعیت کې له شاپور ځدراڼ سره ولاړ دی او همداراز یې ویلي، چې د کرېکټ د ودې لپاره د هغه هڅې باید بابیزه ونه ګڼل شي.
د افغانستان د کرېکټ ملي لوبډلې یو شمېر نورو لوبغاړو هم د شاپور ځدراڼ پر ناروغیو خواشيني څرګنده کړې او د هغه کورنۍ ته یې د درملنې په برخه کې د مالي همکاریو ډاډ هم ورکړی دی.
د کرېکټ دا پخوانی اتل اوس مهال په هند کې تر درملنې لاندې دی او ویل کېږي چې بدن یې د سپینې وینې له کمښت سره مخ دی.
نوموړی له تېرو څو میاشتو راهیسې دغه ناروغي لري، خو په دې وروستیو کې یې روغتیایي وضعیت جدي شوی دی.
