ایران: د هرمز تنګي له لارې یوازې ملکي بېړۍ د سپاه پاسداران په اجازه تېرېدای شي
ایران دولتي ټلویزیون اعلان وکړ چې له دې وروسته د هرمز په تنګي کې د نظامي بېړیو تګ راتګ منعه دی او یوازې ملکي بېړۍ کولی شي د ځانګړو لارو او د سپاه پاسداران د سمندري ځواکونو له اجازې وروسته له دغه تنګي څخه تېرې شي.
د ایران دولتي ټلویزیون د یوه لوړپوړي پوځي چارواکي په حواله راپور ورکړی، چې د هرمز تنګي له لارې د کښتیو د تګ راتګ لپاره نوي محدودیتونه وضع شوي دي. په دغه راپور کې په ډاګه شوې چې نظامي بېړۍ نور د دې تنګي د کارولو حق نه لري او ملکي سوداګریزې بېړۍ هم باید د تېرېدو پر مهال له سپاه پاسداران څخه رسمي اجازه ترلاسه کړي.
هرمز تنګی د نړۍ یوه له خورا مهمو سمندري لارو څخه دی، چې د خلیج هېوادونو د تېلو او ګازو لویه برخه ترې نړیوالو بازارونو ته لېږدول کېږي. ایران تل له دغه تنګي څخه د خپل ستراتیژیک فشار د وسیلې په توګه کار اخیستی او په وار وار یې ګواښ کړی چې د کړکېچ پر مهال به د بېړیو تګ راتګ محدود کړي.
