په کندز ولایت کې د طالبانو امنیې قوماندانۍ ویاند جمعهالدین خاکسار ویلي، چې د دغه ولایت د مرکز او امامصاحب ولسوالۍ ترمنځ پر عمومي سړک د دوو موټرو د ټکر له امله شپږ تنه، چې ښځې هم پکې شاملې دي، مړه شوي دي.
د نوموړي په وینا، پېښه د یو فیلډر او مارکـس موټرو د ټکر له امله رامنځته شوې ده.
په ملګرو ملتونو کې د افغانستان پخوانی استازی محمود صیقل وایي، د ترکیې له خوا د هرات جامع جومات پارک د بیارغونې بشپړېدل نه یوازې د تاریخي میراث د ساتنې مهم ګام دی، بلکې د دواړو هېوادونو ترمنځ فرهنګي همکارۍ هم پیاوړې کوي.
محمود صیقل په خپل ایکس پیغام کې د ترکیې له حکومت څخه مننه کړې چې د هرات د جامع جومات اړوند پارک د بیارغونې پروژه یې بشپړه کړې او د افغانستان د تاریخي او فرهنګي میراث د ساتنې لپاره یې خپلې ژمنې ته دوام ورکړی دی.
هغه ویلي: «ما څو ځله دغه پارک لیدلی و او تل مې احساس کاوه چې جدي ساتنې ته اړتیا لري. اوس دا د خوښۍ ځای دی چې دا کار بشپړ شوی دی.»
د هغه په وینا، د دې پارک بیارغونه نه یوازې یو پاک او مناسب عامه فضا برابروي، بلکې د تاریخي جومات شاوخوا چاپېریال هم ورسره ښه شوی او د فرهنګي میراث د ساتنې پراخې هڅې یې پیاوړې کړې دي.
صیقل زیاته کړې چې دا پروژه د افغانستان او ترکیې ترمنځ د اوږدمهالو فرهنګي اړیکو د لا ژورتیا سبب هم ګرځي.
نوموړي هیله څرګنده کړې چې په افغانستان کې د مشروع حکومت بېرته ټینګښت به د دواړو هېوادونو رسمي اړیکې بېرته عادي کړي او ټول خلک، په ځانګړي ډول ښځې او نجونې، وکولای شي له دې عامه ځای څخه په بشپړه توګه ګټه واخلي.
د طالبانو ټولګټو چارو وزارت وایي، د کابل–غزني لویې لارې د دویم لین د رغونې چارې روانې دي او د د پروژې د چټکتیا، کیفیت او پر وخت بشپړېدو لپاره یې قراردادي شرکتونو ته سپارښتنې کړې دي.
د ټولګټو چارو وزارت د خبرپاڼې له مخې، د دغه وزارت وزیر ملا محمد عیسی ثاني د کابل–غزني لویې لارې د دویم لین د درېیو برخو له رغنیزو چارو څخه لیدنه کړې او د کار بهیر یې له نږدې ارزولی دی.
نوموړي د پروژې مسؤلینو ته لارښوونه کړې چې د کار کیفیت لوړ وساتي او چارې په ټاکلي وخت بشپړې کړي. هغه همداراز ویلي چې د هوا له ښه کېدو او د بارانونو له کمېدو سره دې د سړک د قیر اچونې چارې هم پیل شي.
د وزارت د معلوماتو له مخې، د کابل–غزني لویه لار د هېواد له مهمو او ستراتیژیکو لارو څخه ده، چې د ۱۱۱ کیلومتره سړک د اساسي رغونې چارې په پنځو برخو وېشل شوې دي. دا مهال د لومړۍ، درېیمې او څلورمې برخې کارونه روان دي او د پاتې برخو چارې به هم ژر پیل شي.
د چارواکو په وینا، د دې پروژې له بشپړېدو سره به د خلکو د تګ راتګ ستونزې هوارې شي او د کرنیزو او سوداګریزو توکو د لېږد رالېږد لپاره به اسانتیاوې رامنځته شي.
د طالبانو د پوهنې وزارت وایي، د پکتیکا د پوهنې ریاست په ۱۴۰۴ مالي کال کې له تعلیمي خدمتونو څخه تر ۱،۷ میلیونه افغانیو زیات عواید ترلاسه کړي، په داسې حال کې چې وزارت په یو شمېر ولایتونو کې د ښوونې او روزنې د پراختیا نور اقدامات هم اعلان کړي دي.
د یاد وزارت د معلوماتو له مخې، دغه عواید د شهادتنامو او کانکور فورمونو د وېش له لارې راټول شوي دي.
بلخوا، وزارت وایي چې په کابل ښار کې د تعلیمي خدماتو د پراختیا په لړ کې د ۳۰۰ راستنېدونکو کډوالو ماشومانو د سویې د تثبیت ازموینه اخیستل شوې ده.
د یوه بل راپور له مخې، د کابل ښار په دولسمه ناحیه کې د پلچرخي عالي لېسې زدهکوونکو ته د ځایي خلکو له لوري ۳۰۰۰ټوکه درسي کتابونه ورکړل شوي دي.
همداراز، د لوګر ولایت د برکي برک ولسوالۍ په چهلتن منځني ښوونځي کې د پنځو درسي خونو د جوړولو چارې پیل شوې دي، چې شاوخوا ۲۰۰ زره افغانۍ لګښت پرې راځي او د سیمې خلک یې تمویلوي.
سربېره پر دې، وزارت ویلي چې په ننګرهار ولایت کې د حصارک ولسوالۍ په منهخېلو سیمه کې د یوه ښوونځي د جوړېدو لپاره ۱۶ بسوه ځمکه د یوه ځایي مشر له لوري وقف شوې، څو د نوې تعلیمي ودانۍ د جوړولو لپاره ترې ګټه واخیستل شي.
د د طالبانو کورنیو چارو وزارت وایي، د نشهيي توکو پر ضد د مبارزې معین عبدالرحمن منیر په مشرۍ یو پلاوی د ازبکستان د حکومت په رسمي بلنه د سمرقند ښار ته سفر کړی، څو په یوه نړیواله غونډه کې د نشهيي توکو د ګواښونو په اړه بحثونو کې ګډون وکړي.
د یاد وزارت په خبرپاڼه کې ویل شوي چې دغه پلاوی دازبکستاند ولسمشر د سلاکار ډاکټر عبدالعزیز کاملوف په بلنه سمرقند ته تللی، چیرې چې به د نشهيي توکو د نړیوالو ګواښونو په اړه په یوې مهمې غونډه کې ګډون وکړي.
د معلوماتو له مخې، دغه ناسته د روانې میاشتې په شلمه نېټه جوړېږي، چې پکې د بېلابېلو هېوادونو استازي برخه اخلي او د نشهيي توکو د نړیوالو ګواښونو ترڅنګ به د سیمهییزې او نړیوالې همکارۍ پر لارو چارو هم بحث وشي.
د طالبانو د نشهيي توکو پر ضد د مبارزې معینیت ویلي چې په دې غونډه کې به خپل فعالیتونه، لاسته راوړنې او راتلونکي پلانونه له ګډونوالو سره شریک کړي.
همداراز تمه ده چې د غونډې په څنډه کې به د نشهيي توکو پر ضد د ګډې مبارزې د پیاوړتیا او د هېوادونو ترمنځ د همکارۍ د پراخېدو په اړه هم نظرونه تبادله شي.
د د طالبانو د امر بالمعروف وزارت وایي، د میدان وردګ، نیمروز، کندز، تخار، فاریاب او هلمند ولایتونو کې ۱۳ مېرمنې چې د کورني تاوتریخوالي او ناوړه دودونو له امله له خپلو حقونو بې برخې وې، د دوی په هڅو ژغورل شوي او خپلو شرعي حقونو ته رسېدلې دي.
ددغه وزارت له خوا په خپره شوې خبرپاڼه کې راغلي، د مرکزونو او ولسوالیو په کچه یې په بېلابېلو پېښو کې مداخله کړې او هغه مېرمنې یې ژغورلې چې د کورني تاوتریخوالي او ناوړه ټولنیزو دودونو له امله له خپلو اساسي حقونو محرومې شوې وې.
د مسؤلینو په وینا، یادې ۱۳ مېرمنې له اوږدې مودې راهیسې له سختو ستونزو سره مخ وې، خو د امر بالمعروف د ادارو د هڅو په پایله کې له وضعیت څخه راایستل شوې او خپل شرعي حقوق ورته بېرته ورکړل شوي دي.
دا په داسې حال کې ده چې د طالبانو دغه وزارت په افغانستان کې د ښځو پر وړاندې سخت محدودیتونه وضعه کړي، له شپږم ټولګي پورته د زده کړو بندیز تر څنګ ښځې نشي کولی چې په سیاسي مشارکت کې ګډون وکړي، عامه تفریحي پارکونو ته لاړې شي او سفر وکړي.