په خوست کې د طالبانو ولایتي رسنیز دفتر خبر ورکړی، چې په ګربزو ولسوالۍ کې ډیورنډ کرښې ته څېرمه ۷۰۰ اړمنو کورنیو سره نغدي مرسته شوې ده. خبرپاڼه زیاتوي چې دغه مرستې د خوړو نړیوال پروګرام له لوري د طالبانو د پېښو پر وړاندې د مبارزې او چمتووالي ادارې تر څار لاندې شوې دي.
د مالوماتو له مخې، هرې اړمنې کورنۍ ته ۵۸۰۰ افغانۍ نغدي مرسته وېشل شوې ده. د طالبانو په خبرپاڼه کې ویل شوي چې د طبیعي پېښو له کبله زیانمنو شویو او اړمنو کورنیو سره د مرستو لپاره د دوی هلې ځلې روانې دي.
دا مرستې داې مهال کېږي. چې هېواد د طبیعي پېښو له کبله له سخت ناورین سره مخ دی او بشري مرستې هم د پام وړ را کمې شوې دي. همدا اوس په ټول هېواد کې زرګونونه د سېلابونو او ورښتونو له کبله نړېدلي چې تر اوسه ورسره هېڅ راز لازمې بشري مرستې نه دي شوي او پرته له سرپناوو تر شنه اسمان لاندې اوسېږي.
د ملګرو ملتونو ادارو هم اندېښنه ښوولې چې افغانستان له سختې لوږې، فقر، بې وزلۍ او بشري ناورین سره مخ دی چې نړیواله ټولنه او هېوادونه باید په دغه سخت وخت کې د افغانانو لاسنېوی وکړي.
