د طالبانو امر بالمعروف وزارت وایي، په تېرو دوو اونیو کې یې د فاریاب ولایت په مرکز او ولسوالیو کې ۱۷ هغه مېرمنې له کورني تاوتریخوالي او ناوړه دودونو ژغورلې چې له خپلو شرعي حقونو بېبرخې شوې وې.
د وزارت د معلوماتو له مخې، یادې مېرمنې د ټولنې د ناوړه دودونو او کورني تاوتریخوالي له امله له اوږدې مودې راهیسې له ستونزو سره مخ وې او د خپلو اساسي حقونو څخه بېبرخې پاتې شوې وې.
مسولین وایي، دغه مېرمنې د محتسبینو د هڅو په پایله کې ژغورل شوي او خپل حقوق یې بېرته ترلاسه کړي دي.
د چارواکو په وینا، د یادو مېرمنو ډېری هغه کسان وو چې د خپلو خاوندانو له لوري له دوامداره روحي او جسمي ځورونې سره مخ وې، خو د دوی په مداخلې سره د هغوی د ستونزو د حل هڅې شوې دي.
چارواکي زیاتوي، له اړوندو کسانو ژمنه هم اخیستل شوې چې په راتلونکي کې به له داسې کړنو ډډه کوي.
