د کاناډا لومړی وزیر: له امریکا سره نږدې اړیکې اوس د ځواک پر ځای د کمزورۍ لامل ګرځېدلې دي

رویټرز خبرې اژانس د کارني له قوله لیکلي چې هغه د یکشنبې په ورځ په یوه ویډیويي پیغام کې د خپل هېواد خلکو ته وینا کې د هغو پوځي مشرانو ستاینه هم وکړه چې څه باندې دوه پېړۍ وړاندې یې د امریکا د یرغل پر وړاندې جګړه کړې وه.

کارني د برېټانیايي پوځي قوماندان جنرال اسحاق بروک یوه کوچنی مجسمه په لاس کې نیولې وه، هغه قوماندان چې د ۱۸۱۲م کال په جګړه کې د اوسنۍ کاناډا د دفاع پر مهال وژل شوی و.

هغه وویل چې کاناډا نشي کولی د خپلو ګاونډیانو له لوري د راتلونکو ګډوډیو بشپړ کنټرول ولري، او نه شي کولی خپل راتلونکی یوازې د دې هیلې پر بنسټ جوړ کړي چې وضعیت به په ناڅاپي ډول ښه شي.