د طالبانو تر چتر لاندې د کابل ښاروالۍ وایي، د ښار د پراختیا او سړک جوړونې په روانو پروژو کې زرګونه کورونه، هټۍ او ان ځینې هدیرې نړول شوې دي، چې په دې لړ کې یې له ۱۱ زرو ډېر ملکیتونه اخیستل شوي او لسګونه نوې پروژې هم پلان شوې دي.
د ښاروالۍ چارواکي وایي، تر اوسه شاوخوا ۴۵۰ کیلومتره سړکونه جوړ شوي او د پراختیا لپاره ۱۱ زره او ۲۷۸ ملکیتونه استملاک شوي دي.
د چارواکو په وینا، یوازې د روان کال لپاره ۲۳۳ نورې پراختیايي پروژې هم پلان شوې دي، چې د پلي کېدو لپاره یې له ۱.۹ میلیارده افغانیو زیاته بودیجه ځانګړې شوې ده.
همداراز، ښاروالۍ ویلي چې په تېرو څلور نیمو کلونو کې یې له ۲۸ میلیارده افغانیو څخه زیات عاید ترلاسه کړی دی.
بلخوا، د کابل د قلعه خاطر په سیمه کې یوه شاوخوا ۲۰۰ کلنه هدیره هم د سړک جوړونې له امله اغېزمنه شوې ده. راپور زیاتوي چې د هدیرې ځینې قبرونه خالي شوي او د مړو پاتې شوني د سړک بلې غاړې ته لېږدول شوي دي.
د یادونې وړ ده چې د دغو پروژو ډېری برخه د پخواني جمهوري حکومت پر مهال پیل شوې وه، خو د واک بدلون وروسته بیا د کابل نوې ادارې د دې پروژو د بیا پیل او بشپړولو هڅې ګړندۍ کړې دي.
