یوازې د افغانستان لپاره لوبېږم؛ راشد خان د څو هېوادونو د تابعیت وړاندیزونه رد کړي
د انډیا ټوټې د راپور له مخې، د افغانستان د کرکټ ستوري راشد خان ویلي، چې د هند او اسټرالیا د تابعیت وړاندیزونه یې رد کړي دي. د راشد خان په اړه لیکل شوي کتاب کې د هغه له قوله ویل شوي:«'که زه د خپل هیواد لپاره ونه لوبیږم، نو زه به د بل هیواد لپاره هم ونه لوبیږم».
دا څرګندونې ۲۷ کلن لیګ سپېنر راشد خان د هغه په نامه لیکل شوي کتاب "راشد خان: له سړکونو څخه تر ستورو پورې" کې کړې دي.
د انډیا ټوټي د راپور له مخې، که څه هم راشد خان د اسټرالیا د چلند په اړه په تفصیل سره نه دی غږېدلی خو د هند وړاندیز په تفصیل سره بیانوي چې هغه د ګجرات لپاره په IPL کې لوبه کوله او د ټیم یوه چارواکي هغه ته خبر ورکړ چې د هند د کرکټ بورډ یو لوړ پوړی چارواکی غواړي ورسره وویني.
راشدخان ویلي، «زه ورغلم او هغه ته مې سلام وکړ. موږ خبرې پیل کړې، او هغه وویل: ستاسې په هیواد (افغانستان) کې وضعیت ډیر خراب دی. راشه په هند کې پاتې شه. موږ به تاسو ته د هند اسناد درکړو، دلته ژوند وکړه، دلته کرکټ وکړه. زه د هغه په خبرو حیران وم او نه پوهیدم چې څنګه ځواب ورکړم. مګر ما وخندل او ومې ویل، 'ډیره مننه. زه د خپل هیواد افغانستان لپاره لوبیږم.»
