زیلنسکي: د روسیې پر تېلو بندیزونه کمول جګړه اوږدوي
د اوکراین ولسمشر ولادیمیر زیلنسکي وایي، د روسیې پر وړاندې د بندیزونو نرمول د جګړې واقعیت نه منعکس کوي او د دې هېواد مشرتابه ته دا تصور ورکوي چې جګړې ته دوام ورکولی شي، په داسې حال کې چې د تېلو عواید د اوکراین پر ضد د بریدونو لپاره کارېږي.
زیلنسکي په ایکس خپلو څرګندونه کې ویلي، یوازې په روانه اوونۍ کې روسي ځواکونو تر ۲۳۶۰ډېرې بریدګرې بېپیلوټه الوتکې، له ۱۳۲۰څخه زیاتې لارښود شوې هوایي بمونه او نږدې ۶۰ توغندي د اوکراین پر ښارونو او سیمو ویشتلي دي.
هغه زیاتوي چې د روسیې د تېلو هر ډالر د جګړې د تمویل سرچینه ده او په وینا یې د مسکو له تش په نوم «شپږ سیوري ټانکرونو» څخه له ۱۱۰څخه زیات اوس په سمندر کې فعال دي، چې له لارې یې شاوخوا ۱۲ میلیونه ټنه تېل لېږدول کېږي.
زیلنسکي ویلي چې د بندیزونو د نرمېدو له امله دا تېل یو ځل بیا پرته له جدي محدودیتونو پلورل کېږي، چې ارزښت یې شاوخوا ۱۰ میلیارده ډالرو ته رسېږي او دا پیسې مستقیم د اوکراین پر ضد په بریدونو بدلېږي.
هغه ټینګار کړی چې باید د روسیې د تېلو ټانکرونه ودرول شي او بندرونو ته د هغوی د رسېدو مخه ونیول شي، څو د دې هېواد د تېلو صادرات کم او د فشار سیاست اغېزمن شي.
زیلنسکي همداراز د خپلو ځواکونو د دقیقو عملیاتو ستاینه کړې او له نړیوالو شریکانو یې مننه کړې چې پر روسیې د فشار د زیاتولو لپاره همکاري کوي.
