امارات: ایران د هرمز تنګي په تړاو د باور وړ نه دی او د سولې هڅې له کړکېچ سره مخ دي
متحده عربي امارات وایي چې ایران د هرمز تنګي په اړه د هر ډول یو اړخیزو پرېکړو او ترتیباتو په برخه کې د باور وړ نه دی، په داسې حال کې چې د ایران جګړې د پای ته رسولو هڅې لا هم له کړکېچ سره مخ دي.
د متحده عربي اماراتو یو لوړپوړي چارواکي د جمعې په ورځ رویټرز اژانس ته ویلي، چې د سیمې د هېوادونو ترمنځ بېباوري زیاته شوې او د جګړې د پای ته رسېدو لپاره روانې هڅې کومې څرګندې پایلې ته نه دي رسېدلې. د هغه په وینا، نړیواله ګډه اراده او د نړیوالو قوانینو پلي کېدل د هرمز تنګي د تګ راتګ د ازادۍ یوازینی تضمین دی.
دا په داسې حال کې ده چې د جګړې له پیل څخه دوه میاشتې تېرې شوې، خو هرمز تنګی لا هم تر ډېره تړلی پاتې دی. ایران پر دې مهمې سمندري لارې بندیز لګولی او بل لور ته د امریکا سمندري ځواک د ایران د نفتو صادرات محدود کړي دي.
دغه وضعیت د نړۍ د انرژۍ شاوخوا ۲۰ سلنه اکمالات اغېزمن کړي، چې له امله یې د نفتو بیې لوړې شوې او د نړیوال اقتصادي رکود اندېښنې زیاتې شوې دي.
