ټرمپ: په نړۍوال جام کې د ایران د فوټبال لوبډلې له ګډون سره ستونزه نه لرم
د امریکا ولسمشر ډونالډ ټرمپ اعلان وکړ چې په دغه هېواد کې د فوټبال د نړۍوال جام په سیالیو کې د ایران د ملي لوبډلې له ګډون سره کومه ستونزه نه لري. هغه ټینګار وکړ چې په دې اړه پرېکړه د فوټبال د نړیوال فدراسیون کار دی او دی د دغې ادارې پرېکړو ته درناوی لري.
ډونالډ ټرمپ د یوې پوښتنې په ځواب کې وویل، چې په نړۍوال جام کې د لوبډلو د شتون پرېکړه د فوټبال په نړیوال فدراسیون پورې اړه لري. نوموړي د دغه فدراسیون د مشر د کارونو په ستاینې سره وویل، چې هغه ته درناوی لري او یاده اداره د سیالیو د ټولو تنظیمي چارو مسولیت پر غاړه لري.
ټرمپ دا څرګندونې په داسې حال کې کړې، چې امریکا په ۲۰۲۶ کال کې د فوټبال د نړۍوال جام د یو شمېر سیالیو کوربه توب کوي.
