د غازياباد سړک رغنیزې چارې د درغلیو او بودیجې د نشتوالي له امله درېدلې دي
د کونړ ولایت د اسمار او ناړۍ ولسوالیو ترمنځ د غازياباد سړک د رغنیزو چارو درېدو د سیمې د اوسېدونکو اندېښنې راپارولې دي. ځايي خلک ادعا کوي چې دغه پروژه له نږدې یوې اوونۍ راهیسې د قراردادیانو د درغلیو او د بودیجې د نشتوالي له امله په ټپه ولاړه ده.
ځایي اوسېدونکو افغانستان انټرنشنل ـ پښتو ته ویلي، د دغه سړک چارې چې شاوخوا اته میاشتې وړاندې پیل شوې وې، اوسمهال له جدي ځنډ سره مخ دي. د دوی په وینا، په پروژه کې له پیل راهیسې د شفافیت او کیفیت په اړه شکایتونه موجود وو او قراردادیان په غلا او درغلیو تورنوي.
د ځايي خلکو د معلوماتو له مخې، د دغه ۱۴،۴ کیلومتره اوږد او ۱۴ متره پلن سړک رغنیزې چارې د شاوخوا ۴۴۰ میلیونو افغانیو په لګښت پیل شوی و.
ځايي اوسېدونکي زیاتوي، چې د کار له پیله دوه میاشتې وروسته، د سړک پلنوالی له ۱۴ مترو څخه ۱۲ مترو ته راکم شو، چې د دغه بدلون علت تر اوسه روښانه نه دی او د سړک رغنیزې چارې په ټپه ولاړې دي.
د سیمې خلک پر طالب چارواکو غږ کوي چې د پروژې د درېدو علتونه وڅېړي او د پاتې کارونو د بیا پیل لپاره عاجل ګامونه پورته کړي.
د یادونې وړ ده چې دغه ادعاوې یوازې د کونړ د یو شمېر اوسېدونکو روایت دی او تر اوسه په خپلواکه توګه نه دي تایید شوې.
