د کندوز ولایت یو شمېر اوسېدونکي افغانستان انټرنشنل ـ پښتو ته ویلي، چې په دغه ولایت کې روغتیایي مرکزونه د درملو له جدي کمښت سره مخ دي، چې له امله یې د زېږون خدمات له خنډ او ځنډ سره مخ شوي دي. د دوی په وینا، ان د زېږون پر مهال میندې اړینو روغتیایي امکاناتو ته لاسرسی نه لري.
د کندوز اوسېدونکو ویلي، چې په دغه ولایت کې «هېڅ درمل» نشته او د ډېری کلینیکونو د درملو زېرمې شاوخوا شپږ یا اووه میاشتې وړاندې پای ته رسېدلې دي. د دوی په خبره، له کله څخه چې د مرستندویه موسسو مرستې بندې شوې دي، په کلینیکونو کې نه یوازې درمل نشته، بلکې کافي روغتیایي تجهیزات هم نه تر سترګو کېږي.
د دغه ولایت اوسېدونکي ادعا کوي چې روغتیایي مسوولین له دغه وضعیت څخه خبر دي، خو لا هم په دولتي روغتونونو او کلینیکونو کې د زېږون پر مهال اړین خدمات نه وړاندې کېږي.
ځینو سرچینو دا اندېښنه هم ښودلې چې یو شمېر ناروغې ښځې د درملو او امکاناتو د نشتوالي له امله، له ولسوالیو څخه تر ښار پورې د تګ پر مهال خپل ژوند له لاسه ورکوي.
د یادونې وړ ده چې دغه ادعاوې یوازې د کندوز د یو شمېر اوسېدونکو روایت دی او تر اوسه په خپلواکه توګه نه دي تایید شوې.
