د چین استازی: د فلسطین موضوع باید د ملګرو ملتونو په مشرتابه غونډه کې لومړيتوب ولري
په ملګرو ملتونو کې د چین دایمي استازي فو کانګ ویلي، چې د فلسطین موضوع د منځني ختیځ په کړکېچ کې د روانو ترینګلتیاوو سرچینه ده. هغه د چین له لوري په مې میاشت کې د امنیت شورا د دورهيي مشرتابه چارو د پیل په مناسبت ویلي، چې دا موضوع باید له پامه ونه غورځول شي.
فو کانګ د جمعې په ورځ (د غويي ۱۱مه) په یوې خبري غونډه کې ویلي، چې د فلسطین او اسراییل تکراري شخړو له لسیزو راهیسې دواړو خواوو او سیمې ته لوی سرخوږی جوړ کړی او په باور یې، د فلسطینیانو له ملي حقونو انکار «د خپل وخت لویه بېعدالتي» ده. هغه زیاته کړې، چې دا وضعیت باید ودریږي او «دوه دولتي حل» یوازنۍ عملي لاره ده؛ هر نوی میکانیزم باید دغه لاره پیاوړې کړي.
د چین استازي څرګنده کړې، چې هېواد به یې د امنیت شورا له نورو غړو سره یو ځای د فلسطین د قضیې د هر اړخیز، عادلانه او دوامدار حل لپاره هڅې وکړي، څو د فلسطین او اسراییل سولهییز ګډ ژوند او د منځني ختیځ تلپاتې ثبات تحقق ومومي. هغه وویل، چین به د شورا په کار کې انصاف او شفافیت وساتي او د مسوولیت له قوي احساس او رغنده تګلارې سره همکاري پیاوړې کړي.
چین تر دې مخکې هم په ملګرو ملتونو کې په فلسطین کې د اوربند، د ملکيانو د خوندیتوب او د دوه دولتي حل د بیا فعاله کولو غوښتنې تکرار کړي دي. د رویټرز د راپور له مخې، بېجېنګ ځان د منځګړیتوب پلوي او د څو اړخیز نظم ملاتړی معرفي کوي او وایي، امنیت شورا باید د نړیوالې سولې او امنیت د ساتنې په برخه کې اغېزناک رول ولوبوي.
