زېلېنسکي او د سلواکیا لومړی وزیر په اروپايي ټولنه کې د اوکراین د غړیتوب په اړه غږېدلي
د اوکراین ولسمشر ولادیمیر زېلېنسکي ویلي، چې د سلواکیا له لومړي وزیر روبرټ فیکو سره یې په ټلیفوني اړیکه کې په اروپايي ټولنه کې د اوکراین د شاملېدو په تړاو خبرې کړې دي. په دې خبرو کې سلواکیا له اروپايي ټولنې سره د اوکراین د یوځای کېدو له پروسې خپل ملاتړ څرګند کړی دی.
د اوکراین ولسمشر ولادیمیر زېلېنسکي پر خپل ایکسپاڼه لیکلي، چې دواړه هېوادونه د خپلو اړیکو د پیاوړتیا غوښتونکي دي. نوموړي زیاته کړې: «دا ډېره مهمه وه چې واورم سلواکیا په اروپايي ټولنه کې د اوکراین له غړیتوب څخه ملاتړ کوي او چمتو ده چې په دې برخه کې خپله تجربه له موږ سره شریکه کړي.»
د دواړو هېوادونو مشرانو ترمنځ په دې خبرو کې په نږدې راتلونکي کې د یوې احتمالي لیدنې په اړه هم بحث شوی دی.
دا په داسې حال کې ده چې اوکراین هڅه کوي د اروپايي ټولنې د غړیتوب ترلاسه کولو لپاره د سیمې د هېوادونو ډیپلوماټیک ملاتړ خپل کړي، خو روسیه په اروپايي ټولنه کې د اوکراین د شاملېدو سر سخته مخالفه ده.
