بښنې نړیوال سازمان: پاکستان دې ایمان مزاري او هادي علي چټهه سمدستي خوشې کړي
د بښنې نړیوال سازمان له پاکستاني حکومت څخه غوښتي چې د بشري حقونو وکیلې ایمان مزاري او د هغې مېړه وکیل هادي علي چټهه سمدستي او بې له شرطه خوشې کړي او د هغوی پر ضد صادرې شوې سزاوې لغوه کړي.
یاد سازمان په یوه لیک کې چې د پاکستان لومړي وزیر شهباز شریف ته یې استولی، له حکومت څخه غوښتنه کړې چې د جزایي عدلي نظام ناوړه کارول، په ځانګړي ډول د سایبري جرمونو قوانینو تطبیق، د بشري حقونو د مدافعانو پر ضد ودروي.
د اسلاماباد یوې ناحیوي محکمې د روان کال د جنورۍ په ۲۴مه ایمان مزاري او هادي علي چټهه هر یو په لس لس کاله بند محکوم کړي وو. دواړه اوس مهال د راولپنډۍ په اډیاله زندان کې بنديان دي.
دغه دواړه وکیلان د «پیکا» قانون لاندې د سایبري تروریزم او د ناسمو معلوماتو د خپرولو په تور نیول شوي. دوی په ایکس کې د بلوڅ او پښتون فعالانو ملاتړ کړی او د پاکستان پر پالیسیو یې نیوکې کړې وې.
د بښنې نړیوال سازمان وایي چې په پاکستان کې د پیکا قانون په پراخه توګه د سولهییزو نیوکو د جرم ګڼلو لپاره کارول کېږي، چې دا چاره د دغه هېواد له نړیوالو بشري حقونو مکلفیتونو سره په ټکر کې ده.
دغه سازمان همدارنګه زیاتوي چې په وروستیو میاشتو کې په پاکستان کې د سانسور، څارنې او انټرنیټي بندیزونو کچه لوړه شوې، چې په ځانګړي ډول خبریالان او د بشري حقونو فعالان یې هدف ګرځولي دي.
