متحده ايالاتو پاکستان ته د اېف–۱۶ الوتکو د نوي کولو تړون لاسلیک کړی

په دې قرارداد کې د اېف–۱۶ الوتکو د APG-66 او APG-68 رادار سیسټمونو تخنیکي ملاتړ شامل دی.

دا پرمختګ وروسته له هغه شوی چې د ۲۰۲۵ کال په ډسمبر کې د امریکا د دفاعي امنیتي همکارۍ ادارې کانګرس ته د پاکستان د اېف–۱۶ الوتکو د ملاتړ او عصري کولو لپاره د ۶۸۶ میلیونه ډالرو وړاندیز وړاندې کړی و.

په دغه وړاندیز کې د الوتکو د معلوماتي او برېښنايي سیستمونو پرمختګ، د پېژندنې وسایل، خوندي اړیکې، روزنه او لوژستیکي ملاتړ شامل وو.

د دفاعي امنیتي همکارۍ ادارې ویلي وو چې د دې پروګرام لپاره به اضافي امریکایي پرسونل پاکستان ته نه استول کېږي او دا به د امریکا پر دفاعي چمتووالي اغېز ونه لري.

دغه پروګرام د اېف–۱۶ الوتکو د خدمت مودې تر ۲۰۴۰ کال پورې د غځولو او د هغوی د عملیاتي وړتیاوو د پیاوړتیا لپاره مهم بلل شوی دی، چې پاکستان هم د دغو تخنیکي بدلونونو د منلو او پلي کولو وړتیا ښودلې ده.