ماهرنګ بلوڅ: په پاکستان کې دې د بشري حقونو سرغړونې پای ته ورسېږي
بلوڅ یوالي کمیټۍ مشرې ماهرنګ بلوڅ د ملګرو ملتونو د شکنجې ضد کمېټې د تازه راپور هرکلی کړی او ویلي یې دي چې په پاکستان کې باید د بشري حقونو روانې سرغړونې سمدستي پای ته ورسېږي.
هغې ویلي چې دغه راپور هغه اندېښنې تاییدوي چې له اوږدې مودې راهیسې مطرح کېږي، په ځانګړي ډول بېځایه نیونې، جبري ورکېدنې او د مخالفو غږونو ځپل. د هغې په وینا، د حقونو فعالان، خبریالان او سیاسي کسان لا هم له فشار او ناوړه چلند سره مخ دي.
ماهرنګ بلوڅ زیاته کړې چې حکومت باید د سیاسي یا د هغوی د فعالیتونو له امله د نیول شویو کسانو دوسیې له سره وڅېړي، بندیانو ته طبي اسانتیاوې برابرې کړي او د عادلانه محاکمو ضمانت ورکړي.
هغې ټینګار کړی چې د بشري حقونو درناوی د یو عادلانه او سولهییزې ټولنې لپاره اړین دی.
د یادونې وړ ده چې د ملګري ملتونو د شکنجې کميټۍ یو خپور کړي راپور کې د پاکستان پخواني لومړي وزیر عمران خان د هغه میرمن بشرا بي بي او نور فعالان لکه ادريس خټک ،علي وزیر او ماه رنګ بلوڅ د قضيو په تړاو ځانګړې اندیښنه څرګنده کړې
