پاکستانی څېړنیز انسټيټيوټ: په پاکستان کې د وسلوالو بریدونو او تلفاتو کچه کمه شوې
د پاکستان د شخړو او امنیتي څېړنو انسټیټیوټ وایي چې د ۲۰۲۶ کال د اپرېل په میاشت کې په دغه هېواد کې امنیتي وضعیت ښه شوی او د وسلوالو بریدونو او تلفاتو شمېر د تېرې میاشتې په پرتله د پام وړ کم شوی دی.
د راپور له مخې، په اپرېل میاشت کې ۸۵ بریدونه ثبت شوي، چې د مارچ په پرتله ۴۲ سلنه کمښت ښيي. همداراز د تلفاتو شمېر له ۱۰۶څخه ۶۰ ته راټیټ شوی دی.
راپور د دې بدلون یو لامل د افغانستان له خاورې هاخوا پوځي عملیات، اوربند او روانې خبرې اترې یادوي.
سره له دې، په اپرېل کې ټول ۲۹۱ کسان وژل شوي، چې پکې وسلوال، امنیتي سرتېري او ملکي وګړي شامل دي. د ټپیانو شمېر هم له ۲۱۰څخه ۱۳۱ ته کم شوی دی.
د راپور په وینا، خیبر پښتونخوا او بلوچستان لا هم تر ټولو ډېر اغېزمن ایالتونه دي، خو په قبایلي سیمو کې د امنیتي وضعیت د ښه کېدو نښې لیدل کېږي.
