خیبر پښتونخوا کې تازه د ګوزڼ دوه مثبتې پېښې ثبت شوي
د پاکستان د ګوزڼ د لهمنځه وړلو پروګرام اعلان کړی چې د خیبر پښتونخوا په بنو او شمالي وزیرستان کې د ګوزڼ دوه نوې مثبتې پېښې ثبت شوې دي، چې ورسره د ۲۰۲۶ کال له پیل راهیسې د دې ناروغۍ ټولې پېښې درې ته لوړې شوې دي.
د یاد پروګرام د معلوماتو له مخې، دغه نوې پېښې د پاکستان د ملي بېړني عملیاتو مرکز له تایید وروسته اعلان شوې دي.
چارواکي وایي، دواړه پېښې د «ځنګلي پولیو ویروس» پورې تړاو لري او د ګوزڼ د څارنې شبکې لهخوا راپور شوې دي.
د ګوزڼ ضد مبارزې مسوولان خبرداری ورکوي چې په یادو سیمو کې د واکسین ټیمونو ته محدود لاسرسی د ویروس د خپرېدو لامل شوی او د ماشومانو روغتیا ته یې جدي ګواښ پېښ کړی دی.
د شمېرو له مخې، د روان کال لومړۍ پېښه د سند ایالت په سجاول کې ثبت شوې وه، او اوس په خیبر پښتونخوا کې د دوو نویو پېښو له ثبتېدو سره، د مثبتو پېښو شمېر درې ته رسېدلی دی.
پاکستان او افغانستان لا هم د نړۍ هغه دوه هېوادونه دي چې د ګوزڼ ویروس پکې له منځه نه دی تللی. د روغتیا نړیوال سازمان له ۲۰۱۴ کال راهیسې پر پاکستان د ګوزڼ له امله د سفر محدودیتونه لګولي او له نړیوالو مسافرو د واکسین سند غوښتنه کوي.
