د والسټریټ ژورنال په یوه راپور کې ویل شوي، چې د ایران جګړې د امریکا د پوځي وړتیاوو د ارزونې لپاره یو بېساری فرصت برابر کړی، او د واشنګټن اصلي سیالان دا جګړه له نږدې څاري.
د راپور له مخې، هغه هېوادونه لکه چین، روسیه او شمالي کوریا د دې جګړې په ترڅ کې د امریکا د اوریز ځواک، پوځي ټکنالوژۍ او تجهیزاتو کارونه په دقت سره ارزوي.
ورځپاڼه لیکي، چې دا جګړه د امریکا د پوځي ځواک «شېبه په شېبه» انځور خپلو سیالانو ته وړاندې کوي، ځکه هغوی ویني چې امریکا څنګه خپل د توغندیو زیرمې کاروي، نوې ټکنالوژۍ په جګړه کې ازمويي او دا هم تجربه کوي چې ارزانه وسلې څنګه کولای شي د یوه پیاوړي دښمن پر وړاندې اغېزناک تمام شي.
د ارام سمندر په حوزه کې د امریکايي ځواکونو قوماندان سامویل پاپارو، له قوله ویل شوي، کله چې ترې وپوښتل شول چې چین له دې جګړې څه زده کوي، هغه کانګرس ته وویل: «دوی د کوچنیو او کملګښته مهماتو ځواک ویني.»
د راپور له مخې، د ایران د پوځي تجهیزاتو یوه برخه د چیني ټکنالوژۍ پر بنسټ د برعکس انجنیرۍ له لارې جوړه شوې یا پر چیني پرزو متکي ده، له همدې امله بېجینګ هڅه کوي ځانګړي عملیاتي معلومات ترلاسه کړي او دا درک کړي چې ایران څنګه توانېدلی د خلیج فارس په سیمه کې د امریکا پوځي اډې په نښه کړي.
راپور زیاتوي، چې دا جګړه نه یوازې د سیمې لپاره مهمه ده، بلکې د نړیوالو قدرتونو ترمنځ د پوځي سیالۍ په ارزونه کې هم مهم رول لوبوي.
