روسیه او اوکراین د سومي سیمې د یوه کلي د نیولو په اړه متضادې ادعاوې کړي
روسیې او اوکراین د اوکراین د سومي (Sumy) سیمې د میروپیلیا کلي د کنټرول په اړه متضادې ادعاوې کړې دي؛ مسکو وايي چې دغه کلي یې نیولی، خو کیف دا ادعا ردوي او ټینګار کوي چې سیمه لا هم د اوکرایني ځواکونو تر کنټرول لاندې ده.
د روسیې د دفاع وزارت د شنبې په ورځ ویلي چې د دغه هېواد ځواکونو د اوکراین په شمالي سومي سیمه کې د میروپیلیا کلي کنټرول ترلاسه کړی دی.
دغه وزارت په ټلېګرام کې په خپره شوې خبرپاڼه کې ویلي چې د دوی متحرکو ځواکونو، د بېپیلوټه الوتکو په ملاتړ، اوکرایني ځواکونه له کلي ایستلي او د دوی په وینا، د دښمن احتیاطي ځواکونه له مخکې د توپچي بریدونو له لارې له منځه وړل شوي دي.
بل لوري ته، د اوکراین د پوځ «کورسک ډلې» د فېسبوک له لارې د روسیې دا ادعاوې رد کړې او ویلي یې دي چې دغه راپور «بشپړ دروغ» دي.
په اوکرایني اعلامیه کې ویل شوي: «زموږ ځواکونه د سیمې بشپړ کنټرول لري، هېڅ دښمن پرمختګ نه دی کړی او نه هم په وروستیو ورځو کې کوم بریدیز عملیات ترسره شوي دي.»
