برلین: امریکا په جرمني کې د لرواټنه توغندیو د ځای پرځای کولو پلان لا نه دی لغوه کړی
د جرمني د دفاع وزارت ویلي چې امریکا په دغه هېواد کې د لرواټنه وسلو یا توماهاک توغندیو د ځای پر ځای کولو پلان په بشپړه توګه نه دی لغوه کړی. امریکا په دې وروستیو کې په جرمني کې د خپلو ځواکونو د شمېر کمولو پرېکړه کړې ده.
د وزارت ویاند د دوشنبې په ورځ وویل: «موږ د قطعي لغوه کېدو خبره نه کوو»، او زیاته یې کړه چې دا وسلې لا هم ښايي په جرمني کې ځای پر ځای شي.
دا څرګندونې وروسته له هغه کېږي چې امریکا اعلان وکړ په جرمني کې به خپل شاوخوا پنځه زره سرتېري کم کړي.
دا پرېکړه په پراخه توګه داسې تعبیر شوه چې ګواکې د لر واټنه توماهاک توغندیو د ځای پر ځای کولو پلان هم لغوه شوی دی.
د جرمني د دفاع وزارت ټینګار کړی چې د وسلو د ځای پر ځای کولو په اړه وروستۍ پرېکړه لا نه ده شوې او لاهم دا احتمال شته چې دغه پلان عملي شي.
