مسکو د امریکا لهخوا د روسي ډیپلوماتانو ماشومانو ته په جبري توګه د تابعیت ورکول نه مني
د کرملین ویانده ماریا زاخارووا وایي، روسیه د امریکا له لوري د دوی د ډیپلوماتانو ماشومانو ته ورکړل شوی امریکایي تابعیت په رسمیت نه پېژني. د ټاس خبري اژانس د راپور له مخې؛ زاخارووا دغه څرګندونې د «ودوموستي» ورځپاڼې لپاره په یوې خپرې شوې لیکنه کې کړې دي.
هغې لیکلي: «روسیه د امریکا له لوري د خپلو ډیپلوماتیکو، اداري، تخنیکي او کنسولي کارکوونکو پر ماشومانو د تابعیت تحمیل نه مني». هغې زیاته کړې، مسکو له واشنګټن نه غوښتنه کړې چې په هره جلا قضیه کې دا تایید کړي چې نوی زېږېدلی ماشوم د امریکا د قضایي صلاحیت لاندې نه راځي او له هغه خوندیتوب او امتیازونو برخمن دی چې د ویانا د کنوانسیونونو او د دواړو هېوادونو د هوکړو له مخې ورته ټاکل شوي دي.
دغه څرګندونې داسې مهال کېږي، چې په امریکا کې د زېږون پر بنسټ د تابعیت ورکولو تګلاره د دغه هېواد په کورني سیاست کې یوه لانجمنه موضوع بلل کېږي. ډونالډ ټرمپ په ۲۰۲۵کال کې د یوه اجرایوي فرمان له لارې هڅه وکړه، چې د بهرنیو وګړو د ماشومانو تابعیت محدود کړي؛ خو دغه پرېکړه له حقوقي ننګونو سره مخ شوه او دا مهال د امریکا د سترې محکمې له لوري تر څېړنې لاندې ده.
