یوه افغان پناهغوښتونکي افغانستان انټرنشنل ته په یوه لېږلې ویډیو کې ادعا کړې، چې د ترکیې پوله ساتو ځواکونو سپي ور خوشې کړي او هغوی یې داړلي دي. په ویډیو کې د دغه پناهغوښتونکي پر بدن د ټپونو او وهلو څرګندې نښې هم لیدل کېږي.
د افغانستان انټرنشنل د یوې څېړنې له مخې، هغه افغانان چې د ۱۴۰۰ کال د زمري له سیاسي بدلونونو وروسته د بېکارۍ، بېوزلۍ او د بشري حقونو د پراخو سرغړونو له امله له هېواده وتلي، د ایران او ترکیې په پولو کې له سخت تاوتریخوالي سره مخ شوي دي.
څېړنه زیاتوي چې د پوله ساتو ځواکونو له خوا فزیکي تاوتریخوالی، یرغمل نیونه او په ځینو مواردو کې د لارې طبیعي پېښې د پناهغوښتونکو د مرګ لامل شوې دي.
افغان پناه غوښتونکو له ملګرو ملتونو او د بشري حقونو له مدافع ټولنو غوښتنه کړې، چې دغه مساله وڅیړي.
د ترکیې پولیسو تر اوسه ددې ادعا په اړه غبرګون نه دی ښودلی، خو په دې وروستیو کې ددغه هېواد امنیتي ادارو د بهرنیو پناه غوښتونکو او غیر قانوني کډوالو پر وړاندې خپل اقدامات چټک کړي دي.
له دې وړاندې په پولنډ او بلغاریا کې هم افغان پناه غوښتونکو د دغو هېوادونو له سرحدي ځواکونو شکایت کړی و، چې له پناه غوښتونکو سره تاوتریخوالی کوي.
اروپايي ټولنې له غیر قانوني لارو د کډوالۍ پر وړاندې خپل قوانین او اقدامات په دې وروستیو کې سخت کړي دي.
دغه هېوادونه په دې وروستیو کلونو کې د کډوالۍ له یوې بې سارې څپې سره مخ دي.
