ميا افتخار حسين: دولتي پاليسيو کې پښتونخوا په دوامداره توګه له پامه غورځول کيږي
په خيبرپښتونخوا کې د عوامي نشنل ګوند مشر ميا افختار حسين ويلي، له بده مرغه د پاکستان په دولتي پاليسیو کې پښتونخوا پرله پسې د پامه غورځول کيږي، هغه د برېښنا د پرچاوۍ، د ګاز په اوږد بندښت او د بیو په بې مهاره لوړېدو اندېښنه څرګنده کړې ده.
هغه د دوشنبې په ورځ په يوه بیان کې وويل، خيبرپښتونخوا چې له خپلې اړتیا ډېر او ارزانه برېښنا تولیدوي، له ۱۸ تر ۲۰ ساعتونو پورې برېښنا نه لري.
هغه زیاته کړه، همداراز د ګاز د پرله پسې بندښت له امله کورنی ژوند فلج شوی دی، د خلکو انغري ساړه شوې دي، صنعت ترڅنګ یې کاروبار هم سخت اغېزمنېږي.
د میا افتخار حسين په خبره، د پښتونخوا خلک له مخکې نه د لسیزو راهیسې له ترهګرۍ او بېامنۍ سره مخ دي او د تحریک انصاف ګوند په حکومت یې هم نيوکې کړي چې د تېرو ۱۴ کلونو له خرابې حکومتولۍ امله یې ايالت د بدحالۍ تصویر ګرځېدلی دی.
هغه وويل، ايالتي او مرکزي حکومتونه د پښتونخوا له بنسټیزو ستونزو څخه په بشپړ ډول بېپروا ښکاري او ايالتي حکومت د اساسي حقونو د تر لاسه کولو لپاره هېڅ جدي نه دی. بايد د مرکز سره د ايالت په ستونزو جدي خبرې وکړي.
