د جرمني په لایپزیګ ښار کې پر پلې لار موټر ځغلونې دوه تنه وژلي
د جرمني د لایپزیګ ښار په مرکزي برخه کې د دوشنبې په مازیګر پر یوه ګڼ مېشتې سیمه او پلې موټر ورننوتلی، دوه تنه یې وژلي او ګڼ نور ټپیان دي. پولیسو تراوسه پر پلې لار د موټرځغلونې لامل او د موټرچلوونکي هویت نه دی په ډاګه کړی.
د لایپزیګ ښار پولیسو ځايي رسنیو ته ویلي، چې موټر د اګوسټوس پلاتز له سیمې څخه د ګرېمايشن سړک له لارې د پلي تګ سیمې ته ننوتلی او بیا یې د ښار په مرکزي پلې لار کې حرکت کړی دی.
د لومړنیو راپورونو له مخې، موټر په لوړ سرعت روان و او د پېښې پر مهال شاوخوا ۷۰ تر ۸۰ کیلومتره په ساعت کې چټک ځغلول کېده. ځینې سرچینې په موټر کې د یوې ښځې د موجودیت یادونه هم کوي.
د ټاګېس شپیګل د رپوټ له مخې په پېښه کې دوه تنه وژل شوي دي.
پېښه د ښار په یوه حساسه سیمه کې شوې چې لایپزیګ پوهنتون او نیکولای کلیسا ته نږدې ده.
نیکولای کلیسا د ۱۹۸۹ کال د سولهییز انقلاب له مهمو تاریخي ځایونو ګڼل کېږي.
په ټولنیزو شبکو کې خپرې شوې ویډیوګانې ښيي چې د پېښې په ځای کې پولیس، اور وژونکي او امبولانسونه موجود دي. د اګوسټوس پلاتز په سیمه کې د ژغورنې هلیکوپتر هم ښکته شوی او پولیسو د پېښې ځای کلابند کړی دی.
د یو خپاره شوي انځور له مخې، موټر د پلي تګ سیمه کې له«پاسکوچي» رستورانټ سره سخت زیانمن شوی ولاړ دی.
