د طالبانو روغتیا وزارت وايي، چې په هلمند، پکتیا، بغلان او خوست ولایتونو کې یې د خوراکي توکو د کیفیت، نېټې تېر درملو، بیو او ورته نورو برخو څارنه کړې ده. یاد وزارت زیاته کړې، چې د څار پرمهال یې ۱۶ درملتونونه او روغتيايي کتنځایونه د سرغړونو له امله تړلي دي.
یاد وزارت د دوشنبې په ورځ (د غويي ۱۴مه) په یوې خبرپاڼه کې ویلي، چې د روغتیايي مرکزونو، درملتونونو او کتنځایونو څخه د څار ترڅنګ یې ۳۰۵ قلمه له نېټې تېر درمل هم راټول کړي دي.
یاد وزارت دا نهدي ویلي، چې دغه درملتونونه یې د کومو سرغړونو له امله تړلي دي. طالبانو تر دې وړاندې هم په ځینو نورو ولایتونو کې یوشمېر روغتونونه او درملتونونه له ټاکلي نرخ څخه په لوړې بیې د درملو د پلورلو له امله تړلي وو. د افغانستان په بېلابېلو ولایتونو کې ناسم روغتیایي خدمتونه او بېکېفیته درمل د ناروغانو پر وړاندې تر ټولو لویې ننګوونې دي.
